Benvidos á paxina web de Galiza Nova

Galiza Nova participou hoxe, xunto con membros doutros colectivos, dun acto da Plataforma Queremos Galego na oficina de correos de San Caetano en Santiago de Compostela ás 10:15 da mañá para comezar a campaña de envío de cartóns postais para lle felicitar as festas ao presidente da Xunta e convidalo a que “aproveite o Nadal para reflexionar e mudar a dirección da súa política lingüística”. No texto do postal, lémbraselle a Alberto Núñez Feijóo que “aínda está vostede a tempo de rectificar e facer posíbel que 2010 sexa o ano do necesario impulso que o noso idioma precisa. Nese camiño atopará, sen ningunha dúbida, o apoio da inmensa maioría da sociedade que quere unha lingua milenaria que sente como parte imprescindíbel de si.” O postal despídese afirmando “Eu quero galego e deséxolle que no 2010 tamén vostede queira galego”. Alén das postais a Plataforma Queremos Galego vai distribuir bandeirolas para pór en xanelas e espazos públicos, así como a edición de adhesivos para colocar nos automóbiles.