Galiza Nova do Ribeiro continúa coas actividades programadas na comarca entorno a campaña de lingua que a nosa organización está a desenvolver por todo o país. Desta volta trátase dun acto no que intervirán o Mago Antón máis o Carrabouxo e que terá lugar o mércores 14 ás 17:30 no IES Abrente de Ribadavia. Con esta iniciativa Galiza Nova pretende reivindicar o dereito a usar o galego en todos os ámbitos da vida así como poñer en valor o noso idioma entre a xente máis nova. Esta actividade correrá a cargo de duas importantísimas figuras do noso panorama cultural, que levan anos loitando coas suas porofesións pola normalización da nosa lingua.

Galiza Nova de Valdeorras colocou unha faixa no Barco co lema e estética do material da campaña de lingua. Con esta pancarta quérese visualizar e achegar a nosa mensaxe de defensa do galego á mocidade barquense entre a que cada día hai unha maior perda de galegofalentes e na que perviven moitos tópicos sobre o noso idioma. Esta iniciativa será complementada por outras actuacións que se desenvolverán nos vindeiros días.

Galiza Nova de Bergantiños tras varios repartos do material da campaña de lingua nos centros de ensino, localidades e nas zonas de marcha de Ponteceso e A Laracha, despregou unha faixa nas inmediacións do Xulgado de Carballo baixo o lema “En galego, temos dereito; en galego, é de xustiza”. Entre as vindeiras actividades que a asemblea comarcal ten previsto desenvolver para continuar coa campaña atópase unha “Noite de curtas en galego” que agardamos conte co apoio masivo da mocidade da bisbarra de cara a apoiar ao cinema realizado en galego e producido no noso país.

Galiza Nova presentou o venres 9 de maio a campaña do galego que a nosa organización está a levar a cabo na comarca da Mariña. Na rolda que se celebrou na vila de Ribadeo asistiron a Responsábel Comarcal, Sara Fernández, a membro da Asemblea local, Andrea Martínez e a Secretaria Xeral, Iria Aboi e explicáronse as diversas actividades que se van facer na comarca: os repartos, colocacións de faixas e actos polo de agora previstos no Instituto de Viveiro. A Mariña súmase así as comarcas con grande actividade con motivo desta campaña.

A Marcha Mundial das Mulleres de Galiza da que a Asemblea de Mulleres da nosa organización forma parte, continua a súa loita pola igualdade en tódos os aspectos da vida das mulleres, e sigue apostando pola igualdade de participación no remo de banco fixo, (bateis, traiñeiriñas e traiñas), despois de dous anos de loita polo seu recoñecemento oficial. É por isto que o pasado 11 de Maio realizouse no peirao de Bueu en colaboración co Concello, a dirección Xeral de Deportes da Xunta e o clube do mar de Bueu a III Bandeira de Traineriñas da Marcha Mundial.  

Galiza Nova coloca a súa primeira faixa do país en Allariz. Como podedes ver na mesma utilizouse o lema da campaña e colocouse no balcón da Sociedade Nacionalista Roi Xordo en pleno casco antigo da vila, de onde a poderán ver máis de 20.000 persoas que asistirán á festa do Boi. Galiza Nova na comarca ten previstas máis actividades das que vos iremos informando. Este é o comezo das moitas faixas que estan previstas que despregue Galiza Nova por todas as comarcas do país.

Galiza Nova de Vigo presentou hoxe xoves as actividades da campaña pola lingua de Galiza Nova en rolda de prensa con Olaia Fernández, Deputada no Congreso, Iria Aboi, Secretaria Xeral e Cristovo Vidal, Responsábel Comarcal. Galiza Nova colocará o vindeiro venres 9 de maio unha carpa na Porta do Sol dende as 17:30. Con esta iniciativa pretendese achegar á poboación viguesa, especialmente á mocidade a campaña que a nosa organización está desenvolvendo a prol da normalización do galego. O venres non fiques na casa e vén a carpa de Galiza Nova, na que se repartirá diverso  material. Así mesmo a localidade de Vigo tamén acaba de editar o último número do voceiro Adiante, nesta ocasión nas súas páxinas poderedes atopar entre outros, artigos sobre a ampliación do porto de Vigo ou a precariadade laboral. Preme en ler máis e descarga esta publicación.

O vindeiro sábado 10 de Maio terá lugar na Coruña a Asemblea Constituínte da Nova Organización do estudantado galego.Esta iniciativa que nace das dúas organizacións nacionalistas do ensino CAF e CAE  pretende sumar nunha soa forza ao estudantado de ensino medio e ao universitario para así lograr unha maior incidencia neste ámbito. Galiza Nova estará presente na clausura da asemblea constituínte, que leva por lema  “Organizando o estudantado de hoxe para a Galiza de mañá”

O pasado martes 6 de Maio tivo lugar un debate entre as organizacións xuvenís tanto do BNG como PSoE e PP. No mesmo, ao que asistiu a Secretaria Xeral de Galiza Nova, Iria Aboi, debateuse das políticas xuvenís do goberno galego e estatal, e concretamente das medidas da Dirección Xeral de Xuventude e Solidariedade entre outros departamentos. Tamén se debateu da Comisión Parlamentaria para a investigación da axente electoral nas pasadas eleccións xerais e das propostas e análises políticas a respecto da crise económica.